Le Nez
Blasons, une Anthologie
Eustorg de BEAULIEU (1495-1552)

Nez joliet, poly, bien faconné,
Ne court, ne long, ains proportionné
Comme est requis à toute belle femme,
J’ose bien dire, et te donner la fame
Que, toy absent, ou present, tout seullet
Fais tout le corps humain, ou beau, ou laict.
Est ce donc rien ? O petit membre insigne,
Petit et bon, voire beau, et tresdigne,
Est ce doncq rien de toy, et ton maintien ?
Certes si est ! et ny a entretien,
Propos, ne rys, baisers n’aultre conqueste
Où plaisir soit, si tu n’es à la feste.
O doncques nez bien faict, et relevé,
Point n’est raison que tu soys reprouvé.
Nez bien filé, aorné de bonne grace,
Tu es logé au meilleu de la face
Pour rafreschir les aultres membres tous
D’un vent couliz, souef flairant et doulx,
Aussi pource que tel lieu tu merites
Mieulx qu’aultre nul pour causes treslicites.
Nez point trop large ouvert, gros, et massif,
Ains Nez moyen gracieux, et traictif.
Nez odorant cent foys trop mieulx que basme
Dont la senteur – quand je suis pres madame –
Vient esveiller mes naturelz cinq sens
Plus que ne feit onc à l’eglise encens.
Nez qui lalaine as si tresredolente
Qu’Ambre ne Musc, au pris n’est que fiente.
Nez qu’à plusieurs demy mortz et peris
Vivifias jadis les esperitz.
Nez dont l’odeur n’a nulle autre approchée,
Ne cassolette, ou drogue d’acouchée
Nez poursuyvant ce qu’est bon, et fuyant
Ce qu’est mauvais, inutile et puant.
Nez point morveux, seigneux, ne qui degoutte,
Nez decorant la personne trestoute.
Nez point serré, trop camus n’enfoncé,
Point racourci, punays, maigre, ou froncé.
Et pour conclure : o nez, qui bien te note,
Femme sans toy ressemble une marmotte.
Que dis je : femme ? ouy, et à brief mot :
Tout homme aussi sans toy semble ung marmot.